Kutxa Ekogunearen Euskararen Ginkana euskararekin eta euskaraz dibertitzeko lehiaketa da.

Azalpena

Lehiaketa honetan, euskararekin, hizkuntza aniztasunarekin eta hizkuntza-ekologiarekin lotutako hainbat proba burutu behar izaten dituzte talde lehiakideek. Mundu mailako begiradatik, herri eta eskualderako begirada eta praktiketara egiten da salto.

Euskal Herri osora zabaldu den Euskararen Ginkana orokorraren arrakasta ikusita, herri eta eskualde mailan Euskararen Ginkanak egiteko aukera zabaldu du Kutxa Ekoguneak Euskaltzaleen Topagunearekin elkarlanean 2015etik aurrera.

Tokiko Euskararen Ginkana hauek aurrera emateko, herriko edo eskualdeko eragile sustatzaileak babestu behar du lehiaketa. Modu osagarrian, Euskararen Ginkanak aukera ematen du herri eta eskualdeetako erakunde publikoez gain, eragile, elkarte eta babesle pribatuak inplikatzeko.

Tokiko Euskararen Ginkana lehiaketak bi fase ditu:

1. Fasea: INTERNET BIDEZKO FROGAK. 4-5 aste iraungo ditu fase honek. Webgunean, astero taldeek burutu beharreko proba bat argitaratuko da eta aste bete izango dute taldeek erantzunak bidaltzeko.
2. Fasea: FINALA. Internet bidezko probetan puntu gehien lortzen dituzten lau taldeak pasako dira aurrez aurreko finalera. Finala, eskualdean bertan burutuko da eta bertan erabakiko da nor den talde irabazlea.

HELBURUAK

Helburu orokorra

• Euskaraz jolastuaz, herri eta eskualdeetako herritarren eta taldeen artean hizkuntzekiko sentiberatasuna eta euskararen erabilpena sustatzea.

Helburu zehatzak

Eskualdeak dituen lehentasun eta helburuetara egokitzeko aukera ematen du Euskararen Ginkanak. Edonola ere, tokiko Euskararen Ginkanaren helburu zehatzak hauek izan ohi dira:

• Hizkuntza aniztasuna eta euskara jasangarritasun kontzeptuaren barruan kokatzea. 
• Herri edo eskualdeko hizkuntza aniztasuna ezagutuaz eta balioan jarriaz, euskararekin eta euskaraz gozatzeko aukera eskaintzea.
• Udal edo eskualdeko eragile eta talde anitzak hizkuntza-ekologiara gerturatzea.
• Udal edo eskualdeak euskara eta hizkuntza aniztasunaren alde egiten dituen ekimenak eta proiektuak ezagutaraztea.

EDUKIA

• Lehiakideek euskararekin, hizkuntza aniztasunarekin eta hizkuntza-ekologiarekin lotutako hainbat proba burutu behar izaten dituzte.
• Proba hauek tokiko eragileen behar eta lehentasunetara eta parte hartzaileen perfilari egokitzeko aukera ematen du Euskararen Ginkanak.
• Probek izaera ludikoa dute eta ekintzari eta sorkuntzari garrantzi berezia ematen zaio.

PARTE-HARTZEA

Lehiaketan parte hartzeko, dagokion herri edo eskualdean jaio eta bizi direnen 4-6 laguneko taldea osatu besterik ez da egin behar.

Herri eta eskualde mailako Euskararen Ginkana bakoitza berezia izango da eta berezitasun horiek aintzat hartuta zehaztuko dira lehiaketaren oinarri zehatzak. Euskararen Ginkana babestuko duten Tokiko sustatzaileek (udalak, eskualdeko erakundeak, enpresak, elkarteak…) aukera dute herriko edo eskualdeko talde parte hartzaileen perfila zehazteko, hala nola, eskualdean dauden herrien arteko lehiaketa egitea, gazteen edo gaztelekuen arteko aisialdi eremukoa izatea edo/eta eskolen arteko lehiaketa burutzea.

LEHIAKETAREN ERAGINA

Lehiaketan parte hartzen duten lehiakideez gain, proiektuak duen eragina zabalagoa izaten da.
Batetik, parte hartzea taldekakoa izanik, egitasmoak duen oihartzuna eta eragina handitu egiten da eta zuzenean parte hartzen dutenez gain, zeharka ere hainbat kide aritzen dira bere taldeei laguntzen. Bestalde, lehiaketaren eragina ez da parte hartzaileetara eta hauen inguruko lagunengana mugatzen, Izan ere, sarri taldeen atzean erakunde oso bat egon ohi da, izan udala, eskola edo Gaztelekua kasu. Hirugarrenik, Euskararen Ginkanak zabalpen handia izaten du webgune eta sare sozialen bidez.  

ESKAERAK EGITEKO BALDINTZAK ETA EPEAK

Tokiko Euskararen Ginkana bat aurrera emateko, herriko edo eskualdeko eragile sustatzaileak  egin behar du eskaera eta babestu behar du lehiaketa. Kasu gehienetan, Udalak edo eskualde mailako egitura publikoak izaten dira Kutxa Ekoguneari beren herri edo eskualdean Euskararen Ginkana egiteko eskaera luzatzen dutenak.

Tokiko Ginkanak urtean bi epealditan burutzeko aukera dago, Udazkenean eta Udaberrian. Kutxa Ekoguneari Tokiko Ginkanak egiteko eskaerak egiteko epe eta baldintzak ondorengoak dira:

• UDABERRIKO GINKANAK. 2020ko Udaberrian Euskararen Ginkana egin ahal izateko, eskaera 2020ko urtarrilaren 15a baino lehen egin behar da.
• UDAZKENEKO GINKANAK. 2020ko Udazkenean Euskararen Ginkana egin ahal izateko, eskaera 2020ko ekainaren 10a baino lehen egin behar da.

Tokiko erakunde sustatzaileaz gain, herri eta eskualdeko Euskararen Ginkanak aukera ematen du, modu osagarrian, tokiko eragile, elkarte eta laguntzaile pribatuak inplikatzeko. Hauen ekarpena, handia zein txikia, ekonomikoa edo espezietan, balio handikoa izaten da. Proiektuaren babesle edo proba zehatz batean parte hartzaileak saritzeko aukera izan daitezke eta trukean gure esker ona eta egindako ekarpenaren berri sarean eta webgunean zabaltzen dugu.

Beraz, zure herrian edo eskualdean Euskararen Ginkana egiteko eskaera egiteko, jarri gurekin harremanetan:

Telefonoz: 943 55 20202

E-postaz: itsaso@ekogunea.eus